藝人關嘉敏近年迷上肚皮舞，月前更在公開賽奪冠，她不惜工本訂製性感舞衣參賽，笑言搞到「傾家蕩產」，本月將再度出戰的她，預告會更盡情晒性感！她坦言跳舞初期試過自尊心受損，當場爆喊，幸獲好友的「心靈雞湯」，得以重新振作。
女神關嘉敏憑《女神配對計劃》彈起，顏值及身形同樣吸睛，迷上肚皮舞的她曾在社交網展示性感舞衣造型，即時引起熱議。月前她「盲拳打死老師傅」，僅訓練月餘便出戰內地兩個舞蹈公開賽，更先後奪冠，跳出美麗一仗。女團出身的她談到今次學習新舞種：「年初突然好想試新嘢，依家嘅肚皮舞老師本身係朋友，只係有段日子冇聯絡，我透過社交網睇到佢嘅跳舞片覺得好靚，於是決心跟佢學舞！」
向來大無畏兼正能量滿滿的關嘉敏，坦言起初接觸肚皮舞時試過自尊心受損，更當場爆喊：「本來係嘗試嘅心態，點知愈跳愈認真，想郁動某塊肌肉，但控制唔到，抬頭一望隔籬個老師跳得好有女人味，跟住望鏡發覺自己好似健美小姐咁款，嗰種挫敗感真係好難受！」幸而老師除了授舞外，更以朋友及「社工」身份作開導，令她得以重新振作，並將於本月出戰大型賽事，今次她特意在韓國訂製舞衣：「今次玩盡啲、再性感啲，顏色係我最鍾意嘅Barbie Pink。（好貴？）我覺得肚皮舞係有錢人嘅玩意，再咁落去跳到年尾嘅話，我應該會好窮喇，哈哈！」
拍戲向影后偷師
關嘉敏感恩今年上半年收穫豐富，解鎖成就作出多項新嘗試，除了跳肚皮舞外，更在淡市中加入影壇，接拍處女作《慾望寄生》，令她雀躍不已，她說：「以前女團時都有拍過電影，但當時幾個女仔以跳舞演出為主，唔算係好正式咁演戲。今次我以個人名義客串，可以同影后袁詠儀、余香凝合作，佢哋係非常有經驗嘅演員，加上李佳芯演我嘅上司，淨係喺現場睇都學咗好多嘢。」談到日後的演戲路，她期待能夠作出更多新嘗試，甚至挑戰「癲喪角色」。
原文網址：https://hk.on.cc/hk/bkn/cnt/entertainment/20260811/bkn-20260811000044290-0811_00862_001.html
